كيف كتعرفوا كلكم أنه السر نجاح الغريبة البهلة هو الدليك إلا بغيتيها تجيك هشيشة و كتدوب فالفم خاصك ما تكتريش ليها الزيت و تدلكيها مزيان حتى يدخل الزيت فالدقيق و تليان باش تقدري تكوريها...اليوم جبت ليكم طريقة كتسهل عليكم بزااااف و النتيجة مضمونة إن شاء الله...
ندوزو للمقادير و الطريقة
نبدأعلى بركة الله
غريبة البهلة
المقادير:
1 كيلو دقيق الفورص
رابعة السكر كلاصي
رابعة الزبدة دالعبار
قبيصة الملح
راس المعلقة مسكة حرة
الزيت على حسب الخليط
نصف رابعة جنجلان محمر
نصف رابعة لوز مفسخ و مقلي و مهرمش
3 خمارات الحلوة
الطريقة :
كنحضرو الغريبة ديالنا على جوج مراحل:
المرحلة الأولى نغربل الدقيق و السكر كلاصي فالقصعة نزيد شوية الملح و المسكة الحرة و الزبدة
نخلطو بأطراف الأصابع و نفرك الزبدة مع خليط الدقيق و السكر حتى ندخلها فيه مزيان
عاد نبدا نزيد الزيت و أنا كنخلط و ما نكترش غير القياس اللي يبسس الخليط
نخلطها مزيان و بلا دليك بلا عداب ندير الخليط فالكوكوط
نسد الكوكوط و ما غادي نديرها فوق العافية تطيب هههههههه
لا غير سديها و خليها فشي قنت فالكوزينة على الأقل 24 ساعة و كلما زادت المدة كتجي أحسن
ملي تدوز المدة تحلي الكوكوط غتلاحظي أنه العجينة رطابت
نعملها فالقصعة تاني و نزيد عليها جنجلان و اللوز
و نخلط مزيان و في الأخير نزيد الخميرة
نخلطها مزيان و إلا كانت باقية كتفتت ندلكها غير شوية و هدا شكلها
و ندخلها لفران مسخن و نشعل عليها غير من الفوق فالأول واحد 5 دقائق عاد نشعل من التحت و نخليه مشعول من فوق
و هدا شكلها ملي خرجناها من الفران
كتجي هشيشة و كتدوب فالفم أما المداق غنخليكم تكتشفوه
اللهم أدمها نعمة و بارك لنا فيها و إحفظها من الزوال
0 التعليقات:
إرسال تعليق