مدونتي سر بيتي

المقادير:
العجينة:
500غ دقيق الفورص الخاص بالحلويات
125غ زبدة مدوبة
2 معالق كبار سكر كلاصي
قبصة ملح
ماء الزهر لجمع العجين و إلا كان من نوع جيد ممكن تضيفي ليه ماء بارد
تحضير العجينة:
نغربل الدقيق و الملح و السكر كلاصي و نزيد الزبدة مدوبة و نخرط مزيان بأطراف الأصابع حتى ندخل الزبدة فالدقيق و نحصل على خليط مرمل نزيد الماء الزهر و الماء حتى تجمع العجينة و ما تكون لا قاصحة لا مرخوفة بين و بين ...ندلكها مزيان حتى تولي لينة و مطاطية...نكورها و نغطيها ببلاستيك غدائي و نخليها ترتاح.

الحشوة:
500غ لوز مصلوق و مقشر و منشف و مطحون مع 250غ سكر سنيدة...
شوية المسكة الحرة مدقوقة مع شوية السكر
الماء الزهر تقريبا نصف كاس
50حتى 100غ زبدة على حسب نوعية اللوز
1ملعقة كبيرة كونفتير مشماش يكون سائل
نخلط كل المقادير حتى نحصل على عقدة اللوز نغطيها ببلاستيك و نخليها ليلة كاملة في الثلاجة
الطريقة:

نطلق العجينة فالمدلك و ندوزها فماكينة السباغيتي إلا متوفرة عندك و إلا حاولي ترققي العجينة بالمدلك و صافي.

نشكل العقدة اللوز على شكل قطبان رقاق...

نحط قطيب اللوز فوق العجينة بهاد الطريقة...

نلف عليه العجينة لفة واحدة....

نضغط مزيان بالأصابع باش ما يتحلش...

هنا خديت غلاقة قرعة الزهر باش ناخد العبار ديال الدميلجات و يجيو كلهم نفس القياس...

نحاول نجمع مزيان بلاصة التلاقية...
نستمر بهاد الطريقة حتى نكمل العقدة اللي عندي...عاد نبدا فالتزيين...

ناخد جزء من العجينة نلونو بالأخضر للوريقات و جزء نلونو بالوردي أو اي لون تحبيه و من الأحسن تقومي بهاد الخطوة فالأول ملي تكملي العجينة...
نطلق العجينة الخضراء و الوردية...

ها الطوابع باش شكلت الوريقات و الوريدات...

نبدا التزيين بهاد الطريقة و ندهن بأبيض البيض باش تثبت الوريقات....

نحط الوردة مكان تلاقية باش نخفيها و ما تبانش...

و في الأخير نحط عقيقة فضية وسط الوردة...

نستف الدميلجات فلاطة مغطية بورق السولفيريزي و نغطيها و نخليها ليلة كاملة قبل ما تطيب...
في الغد نسخن الفران مزيان و ندخلها و نبقا نراقبها غير تشمع العجينة صافي نخرجها ...ما خصهاش تتحمر باش تبقا محافظة على الألوان...

ملي تبرد الحلوى ندهنوها بالنباج و نحطوها فأكياس ورقية
و بالصحة و الراحة...

اللهم أدمها نعمة و بارك لنا فيها و إحفظها من الزوال