حلوة كورني باللوز

Posted by najat morabit On الأحد، 8 سبتمبر 2013 0 التعليقات

 

حلوة كورني باللوز

المقادير:

العجينة:
300غ دقيق الحلويات
100غ الزبدة مدوبة
قبيصة الملح
ملعقة كبيرة سكر كلاصي
2 ملاعق كبار بودرة الشكلاط
نصف كاس ماء الزهر
الماء بارد للعجن

حشوة اللوز:
250غ لوز مصلوق و مطحون مع
100غ سكر سنيدة
قشرة حامضة محكوكة
1 بيضة كاملة
نصف كاس ماء الزهر

الطريقة:

نغربل الدقيق و الشكلاط غبرة و السكر كلاصي في القصعة و نزيد المليحة و الزبدة مدوبة.نخلط حتى يترمل الخليط مزيان عاد نضيف الماء الزهر و الماء.نجمع العجينة و لازم تكون قاصحة شوية.ندلكها مزيان حتى ترخف.نكورها و نغيطيها ببلاستيك غدائي و نخليها في الثلاجة ترتاح على الأقل نصف ساعة.

في الوقت اللي العجينة كترتاح ,نحضر خليط اللوز.نطحن اللوز مع السكر و نضيف ليه القشرة الحامض (أو الفاني أو قشرة الليمون أو المسكة الحرة...حسب الرغبة والدوق) البيضة و الماء الزهر.نخلط مزيان و نخليه يرتاح شوية.

نطلق العجينة رقيقة بالمدلك أو بآلة سباكيتي.نقطع بمرشم مدور و من الأحسن يكون مشنف.نلويها و نشكلها بحال كورني و نضغط مزيان باش تلصق و ما تتحل في الفران.

ناخد كيس حلواني فيه دواز مشنف .نملأه بالخليط اللوز و نبدا نعمر الكورني بحال هكدا

نستف الحلوة فوق لاطة ملبسة بالسولفيريزي.ندهن بأبيض البيض و نزوقها بالعقيق الفضي أو الملون.

ندخلها لفرن متوسط الحرارة لمدة 15 حتى 20 دقيقة.لازم اللوز يبقى في لونه و ما يتحمرش بزاف.

هدا شكلها ملي خرجتها من الفرن

ممكن تغطسيها في العسل أو تدهنيها بالنباج .
بالنسبة ليا كنفضل نخليها طبيعية لأني كنحتفظ بيها في الكونجلاتور .ملي كنبغيها عاد كنسخنها في الفرن و نعسلها أو ندهنها بالناباج و نعملها في الكويغطات .

نتمنى تعجبكم و تجربوها.
اللهم أدمها نعمة و بارك لنا فيها و احفظها من الزوال.

0 التعليقات:

إرسال تعليق