مدونتي سر بيتي

السلام عليكم ورحمة الله وبركاته
أخواتي تيشرفني نحط لكم ولو القليل من اللي تنعرف من تصاويب الحلوة فالصراحة حتا أنا غير مبتدئة [SIZE=4]ومازال قدامي الطريق طويل غير هو نقول وليت نتقن شكيلات تينفعوني مع ضيافي المهم اللي بغيت نقول لكل وحدة مابقيتيش تقولي راني منعرفش نعدل حليوات اللوز رآهم صعاب وزيد وزيد حتا حد ماتزاد معلم جربي وديك الساعة حكمي بالنسبة للبلاطو اللي حطيت رآه طريقة كل شكل من أسهل ما يكون وان شاء الله غادي نوضع شرح لكل شكل و اللي عندها أي استفسار أنا موجودة

*مريم الزهراء* - 24-07-2013, 15:22
نجيو دابا للمعقول بالنسبة ليا تيعجبوني حلويات اللوز وتنتفنن فيهم خاص غير لمريشمات وهانتي وليتي فنانة مبدعة
العجينة : كل ما كانت رقيقة بزاف كلما كتبان وزينة وعاطيا منظر غزال اللي فيها ماتدلك دلك علا قلبها واللي عندها الماكينة أيكون أحسن بالنسبة اللي غاتدلك بالمدلك ديما العجينة نعملوها بين زوج ميكات أو ورقات السولفريزي نحاولو ما أمكن مانوصلوش للدقيق باش ماتقصاحش معانا العجينة وتبقى طرية وأحسن حجا نستعملو هو النشا ملي كذلك نقطعو بالمريشمات تاهما ندوزاهم فيه باش يسهل علينا ومايلصقش معانا.
العقدة : وهي الأهم هي اللي كتخلي مذاق الحلوة عموما عندو مذاق راىع مثلا إلا كنا غادي نعملو من كيلو نتاع اللوز أشكال متعددة فيستحسن كل شكل نخصص ليه نكهة تميزو علا بقية الأشكال (روح اللوز،البنان،الڤاني،الفريز،البيستاش،قشور الليمون أو الحامض،،،،) المهم اللي متوفر ثانيا اللوز نفسخوه ونخليوه حتي ينشف من الماء كنخليه يوماين عاد نطحن وٍ حتى يلين ويولي غبرة المرة الأولى بوحدو والثانية مع السكر واللي بغات تزيد التالتة أيكون أحسن
بالنسبة ليا مثلا فهاد الحلويات استعملت 1/2 kg لوز وطحن تو مع 200g سنيدة رقيقة باش مايجي حلو والسر اللي تيخلي العقدة تجئ معلكة وبنينة هو نضيفو ملعقة كبيرة كونفتير مشماش مطحون لكل نص كغ لوز طبعا .
أما العجينة فكن عمل واحد الطريقة زوينة كندخل الزبدة الكونجيلاتور تجمد شوية ونكحها فالحكاكة د ماطيشة من بعد كنعبر قياس الفورص ونأمل معاه ديك الزبدة حتا تندمج معا الدقيق وناخدو غربال ولا صفاية عيونها كبار شوية ونغربلو داك الشي هاد الطريقة مزينة تتخلي العجينة لينة ورطبة حاجة أخرى كتعلق بماء الزهر نستعمل وٍ نوعية جيدة وايكون بارد باش نجمعو بيه العجينة والاهم من دالك منزربوش علا العجينة بالما حقاش رآه الزبدة كافية باش تجمعها غير ألما الزهر تيعطيها النسمة ويجمعها مزيان وندلكوها حتا تشد رأسها ونسد وٍ عليها فيكس بلاستيكي ورآها غاترطلب غير وحدها وتولي رطبة ولينة،
نخليوها ترتاح فالثلاجة شئ ساعة أو أكثر عاد نخدموها وأدبا غادي نحط المقادير اللي كنستعمل :
العجينة : 500g دقيق فورص +125g زبدة + 2 مع ك سكر گلاصي + شوية ملح + ماء الزهر لجمع العجين
العقدة : 500g لوز ً+ 200g سنيدة وشوية المسكة الحرة مانكتروش منها باش متطلقش المر ديالها +50& 100 زبدة بحسب نوعية اللوز واش ميدم ولا ناشف أنا استعملت 90g + مع ك كونفتير مشمش مطحون ويكون ساىل،
اول حاجة إليكم هاد الصورة اللي كتبين كيف أش كنظم كل شكل وأسموا وأخا مدرتش كلشي ولدي ماخلاني برزطني بزاف هههه

نجيو دأبا لشرح حلوة من ابسط ما يكون بحيت صورتها مع المراشم المستعملة فيها تعملي دائرة من العجين وتوضع فوقها أصبع من عقدة اللوز بعد مانكونو دهنا بأبيض البيض نجمعه الجوانب ونقطعو وريدات تاهما قبل مانوضعوهم نده نو بلاصتهم بأبيض البيض وهذا ماكان ،
بالنسبة لتشكيل الحلوة زوج حوائج مهمين لازم ايكونو هما ابيض البيض كنحتاج وحدة ومازال تيشيط وفرشاة رقم 12. هههه نخلي كم معا الصورة

دأبا هاد الشكل سميتو الثويمة أنا كنس تعمل المرشم نتاعو اللي معندهاش تحاول تعمل دوك الشرطات غير بالسكين غير هو حاولو ما أمكن باش ايجيو مقادين هاد المرشم تنحدد بيه ومن بعد تنزيد نفلحهم المهم نعملو دائرة من العجين نضع كويرة من العقدة نجمعو الأطراف باش نديرو كرة هاداك الشي اللي جمعناه هو اللي أيكون التحت باش مايبانش التكماش من الفوق ورآه مصورة الطريقة بالتفصيل ولأي استفسار أنا موجودة

دأبا نوري ليكم هاد الشكيل ديال الوردة سمحولي ماتقنتوش مزيان درت غير وحدة باش نوري لكم الطريقة هاد الحلوة كنت عملتها فالبلاطو الأول إلا مازال عاقلين المهم تانديرو دوائر من العجين كل واحدة فلون علا حسب الاختيار بغيتي ديري خمس أو ست دوائر توضعي وحدة علا الحافة ديال الآخرة مع لصق كل حافة قبل مانوضعو عليها الاخرة مفهوم من بعد نجيو حتا التحت دياول الدوائر ونعملو عقدة اللوز واحد السطير وصافي نجمعو داك العجين اللي لتحت ونبداو ندورو فيها باش تشكل معانا وريدة وفالجانب الأخير ندهنو بأبيض البيض باش تلصق معانا وماتحلش رآه كلشي موضح


دأبا نوري لكم هاد الكموصة فالصراحة يمكن لكن تعملو غير دائرة وحدة من العجين ولكن أنا بغيت نجرب. نعمل زوج عجبني منظرها هاكا تنقطعو زوج دوائر نلصقو بعضهم بالبيض. نححطو كويرة من العقدة ونجمعوها بحال الصرة وصافي مفهومة وهادي صورة تطبيقه
]
نجير دأبا لعاد الحلوة اسمها المنقوشة تاهيا ساهلة تيخص غير المنقاش الصورة كتوضيح تنقطع دائرة من العجين نعمل وسطها كويرة من العقدة تدهن بأبيض البيض لنفوها بحال الكورة داك التكماش نعملوه التحت نبركو عليها شوية نقطع وريدات بالمرشم نلصقهم بالبيض وننقش بالمنقاش وهايا معانا

الحلوة الموالية هي القرن نفس الطريقة المتبعة تنشملو العقدة بهاد الشكل باش تولي معانا كي القرن ونجمعو ليها الأطراف ونقادوها مزيان ونلصقو فيها وريدات ملي طيب نغطسو رأسها فالشكلاط أو العسل أو النباج الحاجة اللي تلصق لينا اللوز محمر وهدايا صورة الشكل


نمرو دأبا للشكل الموالي من أسهل ما يكون تنعمللو قضيب من عقدة اللوز نكونو مسرحين العجينة ندهنوها بالبيض ونلفو عليها القضيب ونبدأ نقطعو فيها علا داك الشكل المبين فالصورة ونلصقو لوريدات


هادي تتسما حلوة العرايش تاهيا منظرها زوين صورتها بالتفصيل الممل والطريقة باينة
تعملوا زوج دوائر وحدة أكبر من الأخري وتلصق بالبيض نحذو العقدة علا شكل حرفY نجمعو غير العجينة من الوسط ونوضعو وريدات بعد مانكونو لصقناهم بالبيض
Read more: http://www.anaqamaghribia.com/vb/group.php?


دأبا شكل حلوة الياسمينة. فالحقيقة تايلزمو المرشم ديالو ولكن اللي بغات تعمل الشكل تنقل عليه فالورق المقوى البلاستيكي ايجيها مزيان غير هو ماغايكونش مسربي بحال المرشم على أي شوفو الصور





وهكذا نكون كملت معاكم جميع الأشكال اللي فلبلاطو نتمنى يعجبكم هاد الشي اللي قدمت لكم
لازم هاد الحلوة تبقي ليلة كاملة عاد نطيبوها مانخليوهاش تحمر غير تشد فراسها وصافي هادي اول مرة استغنيت عن الألوان الاصطناعية وقضيت غير بغبرة الكاكاو فالصراحة عجبتني وغانبقا هي اللي ندير إلا بغيتو تعملوها بحالي نعطيكم الطريقة
ملي خلطت جميع المقادير النشفة مع الزبدة وترمل الدقيق ودخل من الزبدة نقصت حولي ثلث الخليط وضفت عليه شئ زوج معالق كاكاو مر نوع جيد وبقيت نضيف الماء الزهر حتا جمعت العجين
نتمنى هاد العمل البسيط يعجبكم أخواتي فالله فانتظار تعليقاتكم وبدعواتكم معايا